البنات بيقارنونا بمهند
انا بقى ححطلكو مقارنه بين نور والست المصريه
وحعملها حلق...ات حسميها يوميات زوجه مصريه
نور اول مهند يطلع من الشغل بيكلمها يقولها انا خلصت شغل وجاى تقوله تجيلى بالسلامه يا حبيبى تقوم هى تجرى على اوضيتها تلبس احلى فستان شفتشى وتحط الاحمر والاخضر والاصفر وتملا البانيو برفان وتغطس فيه واول ما يدخل تقابله وتبوسه وتحضنه وتقوله بحبك ويقولها بحبك ويفضلو يسبلو لبعض نص ساعه وتكون محضراله الغدا على ضوء الشموع وبعد الغدا ينامو شويه ويقومو ينزلو يتعشو بره ويخرجو ويتفسحو
المصريه اول ما يطلع جوزها من الشغل يتصل بيها متردش من اول مره تانى مره متردش تالت مره تفتح عليه وتقوله عايز ايه ؟ يقولها انا جاى فى السكه . تقوله طب هات معاك 10 كيلو بطاطس على 20 كيلو بصل على طماطم على خيار وفاكهه وتقوله طلبتها وتقفل فى وشه السكه
الراجل يا عين امه يروح السوق ويتبهدل ويشيل على قلبه حاجات اكتر من 50 كيلو واول ما يدخل البيت يلاقى العيال ضربين بعض وبيتخنقو وهى لبسه مريله المطبخ وريحتها تقرفو بتزعقلهم يقوم حاطط الحاجه فى المطبخ تقوم هى زقاه علشان تدخل المطبخ وتقعد تدور فى الحاجه ويا ويله يا سواد ليله لو نسى حاجه من الى قالتله عليها وتقعد ترمى فى البطاطس او البندجان الى بتعمله فى الزيت والدخان يخنقه
ولا ييجى يقولها الاكل خلص ولا لسه انا جى من الشغل جعان تقوله ما انا بتنيل اهو بعمل الاكل انت مبتشوفش؟ خش اتخمد شويه لحد ما اخلص
يروح الراجل يغير هدومه ميلاقيش البجامه بتاعته يروح يقولها فين البجامه تروح قايله له اهى متلقحه عندك تحت السرير بقى ورا الكومدينو ورا الكنبه المهم فى اى حته انا مش فاضيالك الراجل يقعد يدور عليها لحد ما يلاقيها ويلبسها يلاقيها مقطوعه يروحلها يقولها خطيلى البجامه تروح قايله له ما تتنيل انت تخيطها معندكش ايد ؟
الراجل يسلم امره لربنا وياخد الخيط والابره ويخيطها
ييجى يروح ينام يلاقى العيال بيتنططو فوق دماغه يزعقلهم ويشخط فيهم مفيش فايده ويا دوب عينه حتروح فين النوم يلاقى الست بتزغده فى جنبه بتقوله قوم فز الاكل خلص مش ححضر لحد تانى انا
يقوم يستغفر الله ويقعد على التربيزه الاكل وياكل يلاقى الاكل يا اما حادق قوى يا اما ماسخ يجى يقولها تقوله اطفح وانت ساكت لو مش عاجبك قوم متاكولش الراجل ياكل غصب عنه يا عينى ويقوم
عايز بقى ينزل يقعد مع صحابه على القهوه يقولها اكويلى اى حاجه البسها علشان انزل بيها تقوله نعم يا خويا اكويلك كمان مش كفايه واقفه على رجليا وتعابنه من صباحيه ربنا علشان تطفحو اتنيل اكوى لنفسك
يطلع الراجل الهدوم ويكويها اى كلام ويلبسها وينزل وما بيصدق ينزل ولما يرجع بالليل يلاقيها نايمه فى السرير بالعرض فيفرش فى الارض وينام