صباح الخير:
تعلمنا بالمسلسلات والافلام ان البطل مابيموت شوماصار عليه حوادث ومشاكل حتى باطلاق النار عليه ممكن ينجرح بس مابيموت
كيف يموت وهو البطل اللي لازم نشوفو من بداية الفلم إلى نهايته .
هيك تعودنا .ونستغرب من الأفلام التي بيموت فيها البطل وكأن هذا البطل مو بني آدم ولازم يموت .
تذكرني هل شغلة بحالنا كعرب........مثلآ :
بعض حكامنا... متأثرين كثير بهل افلام ...واحدهم مستلم دور البطولة على طول ومابيفكر يعطي فرصة لغيره من ((الممثلين )) انهم يجسدوا دور البطولة ولومرة .....
مو بس الحكام حتى الوزراء كمان...منذ سنوات وانا بشوف أسمائهم ووجوههم وبطونهم التي عم تكبر يوم بعد يوم ...ناسين انه بطل الفلم لازم يكون رياضي وصاحب عضلات . ... وهم لأ.. لسه مصرَين على انهم الأفضل والاكثر كفاءة غصبن عن المثقفين وأجيال الشباب اللي طاق عقلها .
حتى أعضاء البرلمان بكل دولنا هم كمان أبطال ولايموتوا أبدآ ...بكل دورة إنتخابية ممكن تشوف نفس الأسماء ونفس اللافتات والملصقات حتى ان البعض منهم يكتفي بإعلانات الحملة السابقة لأن المجلس البلدي بيكون متعاطف معه فما رح يشيل الإعلانات والملصقات بعد نجاحه لانه بحسب نظرتهم الإستراتيجية والبعيدة المدى يعرف ان هذا البطل ولايمكن يموت ابدآ وأنو في جزء ثاني للفلم بعد أربع سنوات رح ينعرض. فمافي داعي يشيلها ولا يحط اعلانات جديدة لانه هل بطل ناجح ناجح فيها وبلاها
انا صراحة مابحب أتابع الافلام ..بس لما اروح لعند صديقي كنت اسأله دائمآ لما يتعرض بطل الفلم لحادث أو اطلاق نار أو سقوط مميت ,ليش ما مات البطل ؟؟؟ فيقول لي : ((هيك بدو المخرج يافهمان )) ومن كثر ماصار يكررها علي صرت احس حالي فعلاً
مو فهمان
بس بالفترة الاخيرة اكتشفت اني عم افهم شوي شوي لانه لما يزورني وانا قاعد بعد شبر من التلفزيون وماسك الجهاز وافرفر من عاجل الى عاجل الى تقرير الى مقطع صرت أسأله معقول هيك عم بيصير ؟؟ طيب وبطل الفلم ؟؟ صار يقول لي ((هيك بدو الشعب ))
معناها اما الشعب صار هو المخرج
او فلتت الشغلة من ايد المخرج
وانا اما لساتني مو فهمان
او انا من الاول كنت فهمان
اللهم أحفظ بلادنا فلا حافظ لها سواك
مقوول