تفاصيل اتصالات شرطة الإسكندرية يوم «جمعة الغضب»

حصلت « المصرى اليوم» على «C.D» يحمل بعض الاتصالات التى تمت بين قيادات وضباط الشرطة ومدير شرطة النجدة العميد عصام جادالله يوم جمعة الغضب على جهاز الاتصال الخاص بالشرطة، المعروف باسم (b.b.X) والتى كشفت عن أن بعض الضباط كانوا يتعاملون مع المتظاهرين بالحجارة بعد نفاد الذخيرة والغازات المسيلة للدموع وأمكن التعرف على مناصب بعض القيادات الشرطية التى ورد ذكرها فى التسجيل ومنها اللواء علاء رشاد، مساعد مدير الأمن للتدريب، وعصام جاد الله، مدير شرطة النجدة، ومحمد متولى، مدير إدارة قوات الأمن، واللواء سامح اللقانى، نائب المدير لقطاع غرب، وجمال المقرحى، مدير إدارة شرطة المسطحات المائية وطارق عبده مفتش الفرقة ب.

بدأ التسجيل بكلمات من مصدر مجهول قال فيها «دى آخر مرة.. الأهالى دخلت ولعت عربية أمن مركزى.. الموقف هنا فوق ما تتصور.. باقول لسيادتك فوق ما تتصور».

صوت مجهول: خلاص الشعب ركب كدة.

ضابط يدعى عصام جاد الله: السيد العميد محمد متولى لو جاب عربياته برضه هيحصلها حاجة، أنا عايز كماشة عليهم من اليمين والشمال، إحنا دلوقتى بنتعامل.. فقط الغاز خلص دخلوا ولعوا فى عربية أمن مركزى، الموقف فوق ما تتخيل.

صوت مجهول: طب يمشِّى العربيات.

جاد الله: جارى جارى يا علاء بيه جارى، بس توصل لسيادتك التشكيل الأولانى وربنا يسهل.

عصام جاد الله: سامح بيه اللقانى الموقف عند سيادتك إيه؟

اللقانى: مازال فيه تعامل يا عصام بيه وفيه مجموعة من الناحيتين وفيه أعداد كبيرة من محطة مصر، أعداد كبيرة جدا ومحتاجين غاز بنضرب بالغاز زى ماسيادتك سامع كدة محتاجين غاز.

جاد الله: عمليات مركزى.

اللقانى: عصام بيه الوضع خطر الوضع خطر ياعصام بيه، ابعتلى حد.

جاد الله: يا محمد بيه حاتم ياجمال بيه يامقرحى يسيبوا الفرقة ويجولى،.. جمال بيه يا مقراحى سيب اللى عندك ماتتعاملش وروح إحمى قسم المنتزه أول.

المقرحى: إحنا من جميع الاتجاهات حوالينا الناس يا عصام وبنتعامل هنا شوف طارق عبده يطلع له.

جاد الله: السيد العميد طارق عبده.

المقرحى: عصام بيه أنا مش ممكن أسيب المكان هنا، إحنا هنا بنتعامل تعامل جدى.

جاد الله: تمام يا جمال بيه تمام.

جاد الله: إدارة ٤ مكانك فين ٣٠٣ مكانه فين.. إبدأ يا محمود بيه إبدأ.

محمود بيه : تمام بتوع الأمن المركزى دخلوا على القسم تمت السيطرة تماما والحمد لله كان فيه شوية اشتباكات كدة قدام القسم فيه ضابط إتعور برصاصة فى القلب من الأمن المركزى.

حسام الصغير: لو عندك تشكيل فى المندرة يطلع على قسم المنتزة أول.. محمد بيه خليك عندك إنت إتعامل باللى عندك وسيبنا إحنا نتعامل بعون الله.

جاد الله: ٥ م السيد اللواء ٥ م إتفضل إبدأ.

اللواء سيد نصر: عصام بيه فيه أمام عمارات مصطفى كامل مسيرة حوالى ١٥ ألف تقريبا.

جاد الله: لو مافيش إمكانية التعامل معاهم سيادتك ما تستعجلش.

اللواء سيد نصر: طبعا إستحالة التعامل معاهم لإن العملية صعبة هنا خالص.

جاد الله: سيادتك جمع القوات مع سيادتك كدة وجارى مكالمة سيادتك، شكراً.

جاد الله: آلو د ٤ مكانكم فين التشكيل.. فين اللى معاك؟

د ٤: فى شارع جانبى بالقرب من ميدان الساعة مكانكم فين التشكيل اللى معاك.

د ٤: عصام بيه على وجه السرعة الوضع هيصبح غير آمن للقسم.

جاد الله: د ٤ مكانك فين.

د٤: تمام سيادتك كده إحنا فى شارع جانبى بالقرب من ميدان الساعة.

صوت مسؤول أمنى كبير: يا عصام بيه.

جاد الله: إبدأ يا فندم.

صوت مسؤول أمنى كبير: الأهم الآن تأمين الأقسام.. اللى قدامه مسيرة مش قادر يتعامل معاها مايتعاملش معاها مدام ماشية سلمية سيبهم ماشيين لما نأمن أقسامنا بقى ونقف فى مواقعنا، صح جاد الله: صح كده يا فندم إحنا حنعاود التشكيلات بتاعتنا كلها أمام الأقسام لتأمين المواقع الشرطية.

صوت المسؤول الأمنى: صح كده أمِّن بقى القوات والأفراد والأقسام والمسيرة مدام ماشية سلمية خلاص.

جاد الله: تمام كدة سيد بيه نصر لو أمكن يبقى سيادتك هتأمن قسم الرمل أول وقسم سيدى جابر.

اللواء سيد: جارى يا عصام بيه جارى.

مصطفى: عصام بيه لو سمحت فيه حد دخل على نقطة المصانع حد يتوجه بسرعة.

سيد نصر: يا عصام بيه أودى تشكيل قسم سيدى جابر وقسم الرمل وفيه معايا معايا ١١ تم ضبطهم أوديهم على فين.

جاد الله: خدهم معاك سيادتك لأى قسم واتحفظ عليهم كويس وعايزين نشوف نقطة المصانع على طريق المحمودية.

مصطفى بيه: عصام بيه جاد الله.

جاد الله: إبدأ.

مصطفى بيه: باشا عايزين عربيات إسعاف بشارع ٤٥ مجندين وضباط.

جاد الله: تمام هنبعت على طول.

جاد الله: يا مصطفى بيه إطلع على قسم سيدى جابر وشوف نقطة المصانع فيها إيه بسرعة.. سيد بيه خللى سيادتك فى قسم رمل أول والمنتزه أول لو سمحت.

سيد نصر: عصام بيه طلعوا فوق العماير اللى بجوار القسم وضربوا القسم، إبعتلى حد على وجه بسرعة.

جاد الله: عماد بيه فيه تشكيلات عند سيادتك فى قسم المنتزة أول.

سيد نصر: صح كده ياعصام بيه فيه مسيرة تانية جاية اعدادها غفيرة على مرمى البصر، جايه فى الاتجاه المقابل أمام مستشفى الجيش على وجه التحديد.

جاد الله: صح كدة ياسيد بيه شوفها كدة وسيادتك إتوجه لتأمين قسم الرمل أول والمنتزه.

ماهر رشاد: عصام بيه بدأوا يولعوا فى كشك ويولعوا فى حاجات والنار هتدخل جوه القسم.

جاد الله: محمود بيه السيد فيه قوات عندك ممكن تلحق بيها ماهر رشاد.

ماهر رشاد: أنا عندى تجمعات حوالين القسم كتيره يا عصام بيه حاولوا يخشوا لكن الوضع تحت السيطرة.

جاد الله: السيد بيه نصر لو أمكن نلحق ماهر بيه رشاد.

علاء رشاد: عصام بيه.

جاد الله: إبدأ يا علاء بيه.

علاء رشاد: اعتقد إن العربيات والقوات كلها هيتعاملوا معاها هيكون الوضع كارثة شوفوا كده فين وأنا عايز أمن مركزى من اليمين والشمال، إحنا بنضرب بالطوب دلوقتى بس إحنا التعامل سلاحنا طوب دلوقتى.

صوت مسؤول أمنى كبير: ماتتعاملش يا علاء بيه بالطوب وهدى التعامل وأمِّن أقسام الشرطة وأفراد الشرطة وهدى التعامل بقه خالص، بتتعامل بالطوب إزاى.

علاء رشاد: يا فندم حوالى ٣٠ ألف من هنا و٣٠ ألف من هنا الوضع سيادتك فوق ما حد يتصوره.

صوت المسؤول الأمنى: ماتتعاملش يا علاء بيه وهدى التعامل وأمِّن أقسام الشرطة مامعكمش القوات الكافيه اللى تتعامل بيها مع الأعداد الغفيرة دى بهدوء بقى وأمِّن الأقسام.

جاد الله: ٣ م السيد اللواء ١م والاستعلام من السيد اللواء مساعد الوزير الموجود فى الحماية المدنية واستعلام من مكان سيادتك.

٣م: على وجه السرعة يا عصام بيه مواطن من المواطنين كده أصيب بإصابة بالغة.

جاد الله: مواطن عادى يعنى؟

٣ م: أيوه بس عايزين ننقله بسرعة علشان مايعملش هيجان بالمنطقة.

جاد الله: الإسعاف صعب توصل لو أمكن نقله بسيارة تاكسى ولا حاجة.

٣ م: حنشوف ماشى.

وانقطع الاتصال.

دا احسن من فيلم رعب

لازم الشرطة تكون هى الشعب و كان لازم يكونوا مع الثورة